Manjeshwara ಮಂಜೇಶ್ವರಂ: ಜಗತ್ತಿನಾದ್ಯಂತ ಅಪರಾಧ, ಕೊಲೆಗಳು , ಆತ್ಮಹತ್ಯೆ, ವಂಚನೆ, ಸುಲಿಗೆಗಳು ಹೆಚ್ಚಾಗುತ್ತಿದ್ದು ವಯಸ್ಸಿನ ವ್ಯತ್ಯಾಸವಿಲ್ಲದೆ ವಿಕೃತಿ ಮೆರೆಯುತ್ತಿದ್ದಾರೆ. ಅಂತಹದ್ದೇ ಘಟನೆ ಕೇರಳದ ಕಾಸರಗೋಡಿನಲ್ಲಿ ನಡೆದಿದ್ದು ಕಾಸರಗೋಡಿನ ಮಂಜೇಶ್ವರಂನಲ್ಲಿ ಹೆತ್ತ ತಾಯಿಯನ್ನೇ ಮಗನೊಬ್ಬ ಬೆಂಕಿ ಹಚ್ಚಿ ಕೊಲೆ ಮಾಡಿ ಪರಾರಿಯಾಗಿರುವ ಘಟನೆ ನಡೆದಿದೆ.
ವೊರ್ಕಾಡಿಯ ನಲ್ಲಂಗಿಯ ಲೂಯಿಸ್ ಮೊಂಟಾರ ಅವರ ಪತ್ನಿ ಹಿಲ್ಡಾ ಮೊಂಟಾರ (60) ಅವರ ಮಗ ಮೆಲ್ವಿನ್ ಬರ್ಬರವಾಗಿ ಕೊಲೆ ಮಾಡಿದ್ದಾನೆ.

ಮಂಜೇಶ್ವರ ಪೊಲೀಸ್ ಠಾಣೆ ವ್ಯಾಪ್ತಿಯ ವೊರ್ಕಾಡಿಯಲ್ಲಿ ನಿನ್ನೆ ರಾತ್ರಿ ಈ ಘಟನೆ ನಡೆದಿದೆ. ಹಿಲ್ಡಾ ಅವರ ಮಲಗಿದ್ದ ದೇಹದ ಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಲಾಗಿದೆ.
ನೆರೆಮನೆಯವರು ಮತ್ತು ಸಂಬಂಧಿ ವಿಕ್ಟರ್ ಅವರ ಪತ್ನಿ ಲೋಲಿತಾ (30) ಅವರನ್ನು ಮನೆಗೆ ಕರೆಸಿ ಅವರ ತಾಯಿಗೆ ಹುಷಾರಿಲ್ಲ ಎಂದು ಹೇಳಲಾಯಿತು. ನಂತರ, ಲೋಲಿತಾ ಅವರ ದೇಹಕ್ಕೂ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಲಾಗಿದೆ. ಅವರನ್ನು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಲೋಲಿತಾ ಅವರ ಕಿರುಚಾಟ ಕೇಳಿ ನೆರೆಹೊರೆಯವರು ಮತ್ತು ಸ್ಥಳೀಯರು ಅವರ ಮನೆಗೆ ಧಾವಿಸುವಷ್ಟರಲ್ಲಿ, ಮೆಲ್ವಿನ್ ಪರಾರಿಯಾಗಿದ್ದ. ಹಿಲ್ಡಾ ಮೊಂಟಾರ ಅವರ ಇನ್ನೊಬ್ಬ ಮಗ ಆಲ್ವಿನ್ ಮೊಂಟಾರ ಕುವೈತ್‌ನಲ್ಲಿದ್ದು ತಾಯಿಯ ಯೋಗ ಕ್ಷೇಮ ವಿಚಾರಿಸುತ್ತಿದ್ದ ಎನ್ನಲಾಗಿದೆ. ಮಾಹಿತಿ ಪಡೆದು ಸ್ಥಳಕ್ಕೆ ಆಗಮಿಸಿದ ಮಂಜೇಶ್ವರಂ ಪೊಲೀಸರು ಮತ್ತು ಸ್ಥಳೀಯರು ಹುಡುಕಾಟ ನಡೆಸಿದಾಗ ಪೊದೆಗಳಲ್ಲಿ ಹಿಲ್ಡಾಳ ಶವ ಪತ್ತೆಯಾಗಿದೆ. ಆರೋಪಿ ಮೆಲ್ವಿನ್ ತಲೆಮರೆಸಿಕೊಂಡಿದ್ದಾನೆ. ಆರೋಪಿಗಳ ಪತ್ತೆಗೆ ಪೋಲಿಸರು ತನಿಖೆ ಚುರುಕುಗೊಳಿಸಿದ್ದಾರೆ.