ಮುಂಬಯಿ: ಖ್ಯಾತ ಉದ್ಯಮಿ ರತನ್‌ ಟಾಟಾ ಬರೆದಿಟ್ಟಿದ್ದ ಉಯಿಲು ಬಹಿರಂಗವಾಗಿದ್ದು, ಅದರಲ್ಲಿ ನಿಗೂಢ ವ್ಯಕ್ತಿಯೊಬ್ಬರಿಗೆ ಸುಮಾರು 500 ಕೋಟಿ ರೂ. ಆಸ್ತಿಯನ್ನು ಬರೆದಿದ್ದಾರೆ ಎಂದು ವರದಿಯಾಗಿದೆ.
ಉಯಿಲಿನ ಪ್ರಕಾರ ಜಾರ್ಖಂಡ್‌ನ ಜೆಮ್‌ಷೆಡ್‌ಪುರದ ಮೋಹಿನಿ ಮೋಹನ್‌ ದತ್ತಾ ಎನ್ನುವ ವ್ಯಕ್ತಿಗೆ ರತನ್‌ ಟಾಟಾ ಕಡೆಯಿಂದ 500 ಕೋಟಿ ರೂ. ಆಸ್ತಿ ಸಿಗುತ್ತಿದೆ. ಮೋಹಿನಿ ಮೋಹನ್‌ ದತ್ತಾ ಎನ್ನುವವರು ಟಾಟಾ ಗ್ರೂಪ್‌ನ ಕೆಲವೇ ಕೆಲವು ಉನ್ನತ ವ್ಯಕ್ತಿಗಳಿಗೆ ಮಾತ್ರ ಗೊತ್ತು ಎನ್ನಲಾಗಿದೆ. ದತ್ತಾ ಅವರನ್ನು ರತನ್‌ ಐದಾರು ದಶಕಗಳ ಹಿಂದೆಯೇ ಭೇಟಿಯಾಗಿದ್ದರು. ಯಾವುದೋ ಕಾರಣದಿಂದ ಅವರನ್ನು ಬಹುವಾಗಿ ಮೆಚ್ಚಿಕೊಂಡಿದ್ದರು. ಅವರ ಸಂಬಂಧ ಕೊನೆಯವರೆಗೂ ಇತ್ತು. ಹೀಗಾಗಿ, ರತನ್‌ ಅವರು ತಮ್ಮ ಪಾಲಿನ ಆಸ್ತಿಯಲ್ಲಿ ದೊಡ್ಡ ಪ್ರಮಾಣವನ್ನು ಪ್ರೀತಿಯಿಂದ ನೀಡಿದ್ದಾರೆ ಎಂದು ಹೇಳಲಾಗಿದೆ.
ಮೋಹಿನಿ ಮೋಹನ್‌ ದತ್ತಾ ಅವರು ಟ್ರಾವೆಲ್‌ ಹಾಗೂ ಹೋಟೆಲ್‌ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಕಂಪನಿಯೊಂದನ್ನು ತೆರೆದಿದ್ದರು. ಅದೀಗ ಟಾಟಾ ಗ್ರೂಪ್‌ ಒಡೆತನದಲ್ಲಿದೆ. ಅವರ ಮಕ್ಕಳು ಟಾಟಾ ಗ್ರೂಪ್‌ ಅಡಿ ಕೆಲಸ ಮಾಡುತ್ತಿದ್ದಾರೆ. ಆದರೆ, ಅವರ ಬಗ್ಗೆ ಟಾಟಾ ಕಂಪನಿಯಲ್ಲಿ ಹಾಗೂ ಉದ್ಯಮ ವಲಯದಲ್ಲಿ ಬಹುತೇಕರಿಗೆ ಗೊತ್ತಿಲ್ಲಎಂದು ಹೇಳಲಾಗಿದೆ.
ವೈಯಕ್ತಿಕವಾಗಿ ಸುಮಾರು 8 ಸಾವಿರ ಕೋಟಿ ರೂ.ಗೂ ಅಧಿಕ ಮೌಲ್ಯದ ಹಣ, ಆಸ್ತಿಯ ಒಡೆಯರಾಗಿರುವ ರತನ್‌ ಟಾಟಾ ಅವರು ಉಯಿಲಿನ ಮೂಲಕ ಬಹುತೇಕ ಹಂಚಿದ್ದಾರೆ. ಕಳೆದ ವರ್ಷ ಅಕ್ಟೋಬರ್‌ 24 ರಂದು ತಮ್ಮ 86 ನೇ ವಯಸ್ಸಿನಲ್ಲಿ ರತನ್‌ ಟಾಟಾ ಅವರು ನಿಧನರಾಗಿದ್ದರು.
ಟಾಟಾ ಹಾಗೂ ಟಾಟಾ ಸಮೂಹದ ಹೆಸರನ್ನು ಅಕ್ರಮವಾಗಿ ಬಳಸಿಕೊಂಡು ‘ರತನ್‌ ಟಾಟಾ ಐಕಾನ್‌’ ಹೆಸರಿನ ಪ್ರಶಸ್ತಿ ನೀಡಲು ಮುಂದಾಗಿದ್ದ ರಜತ್‌ ಶ್ರೀವಾಸ್ತವ ಎಂಬುವರಿಗೆ ಅಂತಹ ಪ್ರಶಸ್ತಿ ನೀಡದಿರಲು ನಿರ್ಬಂಧಿಸಿ ದೆಹಲಿ ಹೈಕೋರ್ಟ್‌ ಆದೇಶ ನೀಡಿದೆ. ರತನ್ ಟಾಟಾ ಮತ್ತು ಟಾಟಾ ಟ್ರಸ್ಟ್‌ಗಳಿಗೆ ಸಂಬಂಧಿಸಿದ ಲೋಗೋ ಮತ್ತು ಚಿತ್ರಗಳನ್ನು ಸಹ ಆರೋಪಿತ ವ್ಯಕ್ತಿಯು ಬಳಸುವಂತಿಲ್ಲ ಎಂದು ನ್ಯಾಯಾಲಯವು ಹೇಳಿದೆ. ನ್ಯಾಯಮೂರ್ತಿ ಮಿನಿ ಪುಷ್ಕರ್ಣ ಅವರು ವಿಚಾರಣೆಯ ವೇಳೆ, “ಟಾಟಾ ಅವರು ಪ್ರಸಿದ್ಧ ಹೆಗ್ಗುರುತು ಎಂಬುದನ್ನು ಈ ನ್ಯಾಯಾಲಯ ಗಮನಿಸುತ್ತದೆ. ರತನ್ ಟಾಟಾ ಅವರು ಪ್ರಸಿದ್ಧ ವ್ಯಕ್ತಿಯಾಗಿದ್ದಾರೆ. ಅವರ ಹೆಸರು ಸಹ ರಕ್ಷಣೆಗೆ ಅರ್ಹವಾಗಿದೆ ” ಅಭಿಪ್ರಾಯಪಟ್ಟು ನಿರ್ಬಂಧ ವಿಧಿಸಿದ್ದಾರೆ.