ಹೈಲೈಟ್ಸ್‌:

  • ಭಾರತ-ನ್ಯೂಜಿಲೆಂಡ್‌ ನಡುವೆ ನಡೆಯಲಿರುವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್.
  • ಜೂನ್ 18-22ರವರೆಗೆ ಸೌತ್‌ಹ್ಯಾಂಪ್ಟನ್‌ನ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ಪಂದ್ಯ.
  • ಟೀಮ್ ಇಂಡಿಯಾಗೆ ಇಬ್ಬರು ಓಪನರ್ಸ್‌ ಸೂಚಿಸಿದ ಯುವರಾಜ್‌ ಸಿಂಗ್.

ಹೊಸದಿಲ್ಲಿ: ಟೆಸ್ಟ್‌ ಕ್ರಿಕೆಟ್‌ನ ವಿಶ್ವಕಪ್‌ ಎಂದೇ ಮಹತ್ವ ಪಡೆದುಕೊಂಡಿರುವ ಚೊಚ್ಚಲ ಆವೃತ್ತಿಯ ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ತಂಡಗಳು ಪ್ರಶಸ್ತಿಗಾಗಿ ಕಾದಾಟ ನಡೆಸಲಿವೆ.

ಇತ್ತಂಡಗಳಿಗೆ ತಟಸ್ಥ ಅಂಗಣವಾಗಿ ಇಂಗ್ಲೆಂಡ್‌ನಲ್ಲಿ ಈ ಪಂದ್ಯ ಆಯೋಜಿಸಲಾಗಿದೆ. ಸೌತ್‌ಹ್ಯಾಂಪ್ಟನ್‌ನಲ್ಲಿರುವ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ಜೂನ್‌ 18ರಿಂದ 22ರವರೆಗೆ ‘ಬಯೋ ಬಬಲ್’ ವಾತಾವರಣದ ಒಳಗೆ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯ ನಡೆಯಲಿದ್ದು, ಇಡೀ ಕ್ರಿಕೆಟ್‌ ಜಗತ್ತು ಈ ಪಂದ್ಯದ ಕಡೆಗೆ ಮುಖಮಾಡಿ ಕುಳಿತಿದೆ.

ಅಂದಹಾಗೆ ಐಸಿಸಿ ಟೆಸ್ಟ್‌ ಕ್ರಿಕೆಟ್‌ ಶ್ರೇಯಾಂಕಪಟ್ಟಿಯಲ್ಲಿ ನಂ.1 ಮತ್ತು ನಂ.2 ತಂಡಗಳಾದ ಭಾರತ ಮತ್ತು ನ್ಯೂಜಿಲೆಂಡ್‌ ಫೈನಲ್‌ಗೆ ತಲುಪಿರುವುದು ವಿಶೇಷವಾಗಿದೆ. ಹೀಗಾಗಿ ಯಾವ ತಂಡಕ್ಕೆ ಚೊಚ್ಚಲ ಚಾಂಪಿಯನ್‌ಷಿಪ್‌ ಒಲಿಯುತ್ತದೆ ಎಂಬುದು ಸಾಕಷ್ಟು ಕುತೂಹಲ ಕೆರಳುವಂತೆ ಮಾಡಿದೆ.

‘ನಾಯಕತ್ವ ಕಿತ್ತುಕೊಂಡಿದ್ದು ಆಘಾತ ನೀಡಿತ್ತು’, ಕೊನೆಗೂ ಮೌನ ಮುರಿದ ಹೋಲ್ಡರ್‌!

ಈ ನಡುವೆ ಭಾರತ ತಂಡ ಫೈನಲ್‌ ಪಂದ್ಯದಲ್ಲಿ ಯಾವ ಆಟಗಾರರನ್ನು ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿ ಆಡಿಸಬೇಕು ಎಂಬ ಗೊಂದಲ ಎದುರಿಸುತ್ತಿದೆ. ಮೊದಲ ಆಯ್ಕೆಯಾಗಿ ರೋಹಿತ್‌ ಶರ್ಮಾ ಕಾಣಿಸಿಕೊಂಡರೂ ಅವರೊಟ್ಟಿಗೆ ಆಡುವ ಮತ್ತೊಬ್ಬ ಬ್ಯಾಟ್ಸ್‌ಮನ್‌ ಯಾರಿರಬಹುದು ಎಂಬ ಕುತೂಹಲ ಶುರುವಾಗಿದೆ. ಮಯಾಂಕ್‌ ಅಗರ್ವಾಲ್ ಮತ್ತು ಶುಭಮನ್‌ ಗಿಲ್‌ ನಡುವೆ ಈ ಸ್ಥಾನಕ್ಕಾಗಿ ಭಾರಿ ಪೈಪೋಟಿ ಎದುರಾಗಿದೆ. ಹೆಚ್ಚುವರಿ ಆಯ್ಕೆಯಾಗಿ ಕೆಎಲ್‌ ರಾಹುಲ್ ಕೂಡ ಇದ್ದಾರೆ. ಈ ಬಗ್ಗೆ ಮಾತನಾಡಿರುವ ಮಾಜಿ ಆಲ್‌ರೌಂಡರ್‌ ಯುವರಾಜ್‌ ಸಿಂಗ್‌ ಸೂಕ್ತ ಓಪನರ್ಸ್‌ ಯಾರೆಂದು ಸಲಹೆ ನೀಡಿದ್ದಾರೆ.

“ಟೆಸ್ಟ್‌ ಕ್ರಿಕೆಟ್‌ನಲ್ಲಿ ರೋಹಿತ್‌ ಶರ್ಮಾ ಈಗ ಅನುಭವಿ ಆರಂಭಿಕ ಬ್ಯಾಟ್ಸ್‌ಮನ್‌. ಓಪನರ್‌ ಆಗಿ ಈಗಾಗಕೇ 7 ಶತಕಗಳನ್ನು ಬಾರಿಸಿದ್ದಾರೆ. ಆದರೂ ರೋಹಿತ್‌ ಮತ್ತು ಶುಭಮನ್‌ ಗಿಲ್‌ಗೆ ಇಂಗ್ಲೆಂಡ್‌ ಪಿಚ್‌ಗಳಲ್ಲಿ ಓಪನಿಂಗ್ ಮಾಡಿ ಅಭ್ಯಾಸ ಇಲ್ಲ. ಈ ಜೋಡಿ ಕಣಕ್ಕಿಳಿದಿದ್ದೇ ಆದರೆ ಮೊದಲಿಗೆ ಸ್ವಿಂಗ್‌ ಆಗುವ ಡ್ಯೂಕ್‌ ಚೆಂಡಿನ ಎದುರು ಬ್ಯಾಟ್‌ ಮಾಡುವುದನ್ನು ಕರಗತ ಮಾಡಿಕೊಳ್ಳಬೇಕಿದೆ. ಜೊತೆಗೆ ಅಲ್ಲಿನ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವ ಅಗತ್ಯವಿದೆ. ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಯಶಸ್ಸು ತಂದುಕೊಟ್ಟ ರೋಹಿತ್‌-ಗಿಲ್‌ ಅವರನ್ನೇ ಇಲ್ಲಿಯೂ ಮುಂದುವರಿಸಿದರೆ ಸೂಕ್ತ,,” ಎಂದು ಸ್ಪೋರ್ಟ್ಸ್‌ ಟಾಕ್‌ ಪಾಡ್‌ಕಾಸ್ಟ್‌ ಕಾರ್ಯಕ್ರಮದಲ್ಲಿ 39 ವರ್ಷದ ಮಾಜಿ ಕ್ರಿಕೆಟಿಗ ಯುವಿ ಮಾತನಾಡಿದ್ದಾರೆ.

ಸಾರ್ವಕಾಲಿಕ ಶ್ರೇಷ್ಠ ಇಂಡೊ-ಪಾಕ್ ಟಿ20 ತಂಡ ಕಟ್ಟಿ ಧೋನಿಗೆ ನಾಯಕತ್ವ ಕೊಟ್ಟ ಅರಾಫತ್!

“ಇಂಗ್ಲೆಂಡ್‌ನಲ್ಲಿ ಒಂದೊಂದೇ ಅವಧಿಯಲ್ಲಿ ಬ್ಯಾಟಿಂಗ್‌ ಮಾಡುವುದರ ಕಡೆಗೆ ಗಮನ ನೀಡಬೇಕು. ಬೆಳಗ್ಗಿನ ಸಮಯ ವೇಗಿಗಳು ಸ್ವಿಂಗ್‌ ತರಬಲ್ಲರು. ಜೊತೆಗೆ ಪರಿಸ್ಥಿತಿಗಳು ವೇಗಿಗಳಿಗೆ ಬೆಂಬಲ ನೀಡುತ್ತವೆ. ಇದನ್ನು ನಿಭಾಯಿಸಿದರೆ ಮಧ್ಯಾನ ಉತ್ತಮವಾಗಿ ಸ್ಕೋರ್ ಮಾಡಬಹುದು. ಚಹಾ ವಿರಾಮದ ಬಳಿಕ ಚೆಂಡು ಮತ್ತೆ ಸ್ವಿಂಗ್‌ ಆರಂಭಿಸುತ್ತದೆ. ಈ ಸ್ಥಿತಿಗಳಿಗೆ ನೀವು ಹೊಂದಿಕೊಂಡಿದ್ದೇ ಆದರೆ ಯಶಸ್ಸು ಕಾಣಬಹುದಾಗಿದೆ,” ಎಂದಿದ್ದಾರೆ.

ಇದಕ್ಕೂ ಮುನ್ನ ಟೀಮ್ ಇಂಡಿಯಾ ಕೋಚ್‌ ರವಿ ಶಾಸ್ತ್ರಿ, ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ನಲ್ಲಿ ಚಾಂಪಿಯನ್ಸ್‌ ಎಂದು ತೀರ್ಮಾನಿಸಲು ಕನಿಷ್ಠ 3 ಪಂದ್ಯಗಳನ್ನು ಆಡಿಸಬೇಕು ಎಂದು ಅಭಿಪ್ರಾಯ ಪಟ್ಟಿದ್ದರು. ಇದೀಗ ಯುವರಾಜ್‌ ಸಿಂಗ್‌ ಕೂಡ ಇದರ ಪರ ಬ್ಯಾಟ್‌ ಬೀಸಿದ್ದಾರೆ. ಇಂತಹ ಮಹತ್ವದ ಟೂರ್ನಿಗೆ ಫೈನಲ್‌ನಲ್ಲಿ ಬೆಸ್ಟ್‌ ಆಫ್ 3 ಪಂದ್ಯ ಆಡಿಸಬೇಕಿತ್ತು ಎಂದಿದ್ದಾರೆ.

ಭಾರತ ತಂಡ ನ್ಯೂಜಿಲೆಂಡ್‌ ವಿರುದ್ಧದ ಫೈನಲ್‌ ಪಂದ್ಯದ ಬಳಿಕ ಜುಲೈನಲ್ಲಿ ಸಂಪೂರ್ಣವಾಗಿ ಇಂಗ್ಲೆಂಡ್‌ನಲ್ಲೇ ಉಳಿದುಕೊಳ್ಳಲಿದೆ. ನಂತರ ಆಗಸ್ಟ್‌ 4ರಂದು ಆರಂಭವಾಗಲಿರುವ ಇಂಗ್ಲೆಂಡ್‌ ವಿರುದ್ಧದ 5 ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್ ಸರಣಿಯಲ್ಲಿ ಕಣಕ್ಕಿಳಿಯಲಿದೆ.



Source link

Leave a Reply

Your email address will not be published.