ಹೈಲೈಟ್ಸ್‌:

  • ಕೇರಳದ ಮೊದಲ ರೇಡಿಯೋ ಜಾಕಿಯಾಗಿ ಖ್ಯಾತರಾಗಿದ್ದ ಅನನ್ಯಾ ಕುಮಾರಿ ಅಲೆಕ್ಸ್
  • 2021ರ ವಿಧಾನಸಭೆ ಚುನಾವಣೆಯಲ್ಲಿ ನಾಮಪತ್ರ ಸಲ್ಲಿಸುವ ಮೂಲಕವೂ ಸುದ್ದಿಯಲ್ಲಿದ್ದರು
  • ಕೊಚ್ಚಿಯಲ್ಲಿರುವ ಅಪಾರ್ಟ್‌ಮೆಂಟ್‌ನಲ್ಲಿ ಅನನ್ಯಾ ಕುಮಾರಿ ಶವ ಪತ್ತೆ
  • ಶಸ್ತ್ರಚಿಕಿತ್ಸೆಯಲ್ಲಿ ವೈದ್ಯರ ನಿರ್ಲಕ್ಷ್ಯದಿಂದ ಆರೋಗ್ಯ ಸಮಸ್ಯೆ ಎದುರಾಗುತ್ತಿದೆ ಎಂಬ ಆರೋಪ
  • ಅನನ್ಯಾ ಸಾವಿನ ಕುರಿತು ತಕ್ಷಣ ತನಿಖೆ ನಡೆಸಲು ಆರೋಗ್ಯ ಸಚಿವೆ ಆದೇಶ

ಕೊಚ್ಚಿ: ಕೇರಳದ ಮೊದಲ ತೃತೀಯ ಲಿಂಗಿ ರೇಡಿಯೋ ಜಾಕಿ ಹಾಗೂ ಚುನಾವಣೆಯ ಅಭ್ಯರ್ಥಿ ಎನಿಸಿದ್ದ ಅನನ್ಯಾ ಕುಮಾರಿ ಅಲೆಕ್ಸ್ ಅವರು ಕೊಚ್ಚಿಯಲ್ಲಿನ ತಮ್ಮ ಅಪಾರ್ಟ್‌ಮೆಂಟ್‌ನಲ್ಲಿ ಮಂಗಳವಾರ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಕೆಲವು ದಿನಗಳ ಹಿಂದಷ್ಟೇ ಅವರು ತಮ್ಮ ಲಿಂಗ ಪುನರ್ ವಿಂಗಡಣೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಆದರೆ ಅದು ವಿಫಲವಾಗಿತ್ತು. ಈ ಕುರಿತು ಅವರು ತಮ್ಮ ನೋವು ಹಂಚಿಕೊಂಡಿದ್ದರು.

‘ನಾನು ಸಂಪೂರ್ಣ ವೈದ್ಯಕೀಯ ನಿರ್ಲಕ್ಷ್ಯದ ಬಲಿಪಶುವಾಗಿದ್ದೇನೆ. ನನ್ನ ಗುಪ್ತಾಂಗವು ಮಾಂಸದ ತುಂಡಿನಂತೆ ಕಾಣಿಸುತ್ತಿದೆ. ಅದು ಯೋನಿಯ ಯಾವ ಹೋಲಿಕೆಯನ್ನೂ ಹೊಂದಿಲ್ಲ. ನನಗೆ ಮರು ಶಸ್ತ್ರಚಿಕಿತ್ಸೆ ಬೇಕಿದೆ. ನನಗೆ ನ್ಯಾಯ ಬೇಕು’ ಎಂದು 28 ವರ್ಷದ ಅನನ್ಯಾ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು.
ದೇಶದ ಗಮನ ಸೆಳೆದಿದ್ದ ‘ಬಾಬಾ ಕಾ ಡಾಬಾ’ ಮಾಲೀಕನಿಗೆ ಭಾರಿ ನಷ್ಟ: ಆತ್ಮಹತ್ಯೆಗೆ ಪ್ರಯತ್ನ
ಆದರೆ, ಈ ಸಂದರ್ಶನ ನೀಡಿದ ಕೆಲವೇ ದಿನಗಳಲ್ಲಿ ಅವರು ಶವವಾಗಿ ಪತ್ತೆಯಾಗಿದ್ದಾರೆ. ಇದು ಆತ್ಮಹತ್ಯೆ ಇರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ.

ಅನನ್ಯಾ ಅವರ ಲಿಂಗ ಶಸ್ತ್ರಚಿಕಿತ್ಸೆಯ ಅಸಮರ್ಪಕವಾಗಿ ನಡೆಸಲಾಗಿತ್ತು ಎಂದು ಅವರ ಸಾವಿನ ಬಳಿಕ ತೃತೀಯ ಲಿಂಗಿಗಳ ಸಂಸ್ಥೆ ದೂರು ನೀಡಿದೆ. ಈ ಹಿನ್ನೆಲೆಯಲ್ಲಿ ಕೂಡಲೇ ಸೂಕ್ತ ತನಿಖೆ ನಡೆಸುವಂತೆ ಕೇರಳ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಆದೇಶಿಸಿದ್ದಾರೆ. ಲಿಂಗ ಮರುವಿಂಗಡಣೆ ಶಸ್ತ್ರಚಿಕಿತ್ಸೆಯ ವಿಷಯಕ್ಕೆ ಸಂಬಂಧಿಸಿದಂತೆ ಅಧ್ಯಯನ ನಡೆಸಲು ಪರಿಣತರ ಸಮಿತಿಯೊಂದನ್ನು ರಚಿಸಲಾಗುವುದು ಎಂದೂ ಅವರು ಹೇಳಿದ್ದಾರೆ.

ಶಸ್ತ್ರಚಿಕಿತ್ಸೆ ಬಳಿಕ ವಿಪರೀತ ನೋವು
ಅನನ್ಯಾ ಅವರು ಖಾಸಗಿ ಆಸ್ಪತ್ರೆ ಹಾಗೂ ವೈದ್ಯರೊಬ್ಬರ ವಿರುದ್ಧ ನಿರ್ಲಕ್ಷ್ಯದ ಆರೋಪಗಳನ್ನು ಮಾಡಿದ್ದರು. ಕಳೆದ ವರ್ಷದ ಜೂನ್‌ನಲ್ಲಿ ಶಸ್ತ್ರಚಿಕಿತ್ಸೆ ಮಾಡಿಕೊಂಡ ಬಳಿಕ ತೀವ್ರ ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿರುವುದಾಗಿ ಹೇಳಿಕೊಂಡಿದ್ದರು. ಶಸ್ತ್ರಚಿಕಿತ್ಸೆ ನಡೆದು ವರ್ಷದ ಬಳಿಕವೂ ದೈಹಿಕ ನೋವಿನಿಂದಾಗಿ ಕೆಲಸ ಮಾಡಲು ಆಗುತ್ತಿಲ್ಲ ಎಂದು ತಿಳಿಸಿದ್ದರು.

‘ಗುಪ್ತಾಂಗದ ಬಳಿ ಅತೀವ ನೋವಾಗುತ್ತದೆ. ಹೆಚ್ಚು ಸಮಯ ಕುಳಿತುಕೊಳ್ಳಲು ಅಥವಾ ನಿಲ್ಲಲು ಕೂಡ ಸಾಧ್ಯವಾಗುತ್ತಿಲ್ಲ. ಸೀನು ಬಂದಾಗ, ನಕ್ಕಾಗ ಅಥವಾ ಹಲ್ಲುಜ್ಜುವಾಗಲೂ ತುಂಬಾ ವೇದನೆಯಾಗುತ್ತದೆ. ಕೆಲವೊಮ್ಮೆ ಉಸಿರಾಟದ ಸಮಸ್ಯೆಯೂ ಉಂಟಾಗುತ್ತಿದೆ’ ಎಂದು ಹೇಳಿದ್ದರು.
ಗುಂಡ್ಲುಪೇಟೆ: ಟ್ರ್ಯಾಕ್ಟರ್‌ ಹರಿದು ಬಾಲಕ ಸಾವು; ಘಟನೆಗೆ ಕಾರಣನಾದ ಯುವಕ ನೊಂದು ಆತ್ಮಹತ್ಯೆ
ಚುನಾವಣೆಯಲ್ಲಿ ವಿವಾದ
ಏಪ್ರಿಲ್‌ನಲ್ಲಿ ನಡೆದ ಕೇರಳ ವಿಧಾನಸಭೆ ಚುನಾವಣೆಯಲ್ಲಿ ಅವರು ಮಲಪ್ಪುರಂ ಜಿಲ್ಲೆಯ ವೆಂಗಾರಾ ಕ್ಷೇತ್ರದಿಂದ ನಾಮಪತ್ರ ಸಲ್ಲಿಸಿದ್ದರು. ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ (ಐಯುಎಂಎಲ್) ಅಭ್ಯರ್ಥಿ ವಿರುದ್ಧ ಡೆಮಾಕ್ರಟಿಕ್ ಸೋಷಿಯಲ್ ಜಸ್ಟೀಸ್ ಪಾರ್ಟಿ (ಡಿಎಸ್‌ಜೆಪಿ) ಅಭ್ಯರ್ಥಿಯಾಗಿ ಕಣಕ್ಕಿಳಿಯಲು ಮುಂದಾಗಿದ್ದರು. ಆದರೆ ತಮ್ಮದೇ ಪಕ್ಷದ ನಾಯಕರಿಂದ ಕಿರುಕುಳ ಹಾಗೂ ಜೀವ ಬೆದರಿಕೆ ಬರುತ್ತಿದೆ ಎಂದು ಆರೋಪಿಸಿದ್ದರು. ನಾಮಪತ್ರ ಹಿಂಪಡೆಯಲು ಸಾಧ್ಯವಾಗದ ಕಾರಣ ಅವರು ಡಿಎಸ್‌ಜೆಪಿಗೆ ಬೆಂಬಲ ನೀಡಬೇಡಿ ಎಂದು ಮನವಿ ಮಾಡಿದ್ದರು. ಚುನಾವಣಾ ಕಣದಿಂದ ಹಿಂದೆ ಸರಿದಿದ್ದರೂ ಅವರಿಗೆ 135 ಮತಗಳು ಬಂದಿದ್ದವು.

ಸಹಾಯವಾಣಿ
ಯಾವುದೇ ವ್ಯಕ್ತಿ ಮಾನಸಿಕ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದರೆ ಅಥವಾ ಆತ್ಮಹತ್ಯೆಯ ಆಲೋಚನೆಗಳು ಬಂದಿದ್ದರೆ ಅವರಿಗೆ ಸಹಾಯ ಮಾಡಲು ಪ್ರತಿ ರಾಜ್ಯದಲ್ಲಿಯೂ ಆತ್ಮಹತ್ಯಾ ತಡೆ ಸಂಸ್ಥೆಗಳ ಸಹಾಯವಾಣಿಗಳು ಕಾರ್ಯ ನಿರ್ವಹಿಸುತ್ತಿವೆ. ರಾಜ್ಯದಲ್ಲಿ ದಿನದ 24 ಗಂಟೆಯೂ ಕಾರ್ಯನಿರ್ವಹಿಸುವ ‘ಸಹಾಯ’- 080 65000111, 080 65000222 ಸಹಾಯವಾಣಿಯನ್ನು ಸಂಪರ್ಕಿಸಬಹುದು.



Source link

Leave a Reply

Your email address will not be published.