ಹೈಲೈಟ್ಸ್‌:

  • ಜೂನ್ 18-22ರವರೆಗೆ ನಡೆಯಲಿರುವ ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್ ಫೈನಲ್.
  • ಇಂಗ್ಲೆಂಡ್‌ ವಿರುದ್ಧ ಟೆಸ್ಟ್‌ ಸರಣಿ ಗೆದ್ದು ಆತ್ಮವಿಶ್ವಾಸದ ಅಲೆಯಲ್ಲಿರುವ ನ್ಯೂಜಿಲೆಂಡ್.
  • ಕಿವೀಸ್‌ಗೆ ಮೇಲುಗೈ ಇದೆಯಾದರೂ ಭಾರತಕ್ಕೆ ಯಾವುದೇ ಆತಂಕವಿಲ್ಲ ಎಂದ ಪೂಜಾರ.

ಹೊಸದಿಲ್ಲಿ: ಇತ್ತೀಚೆಗಷ್ಟೇ ಅಂತ್ಯಗೊಂಡ ಆತಿಥೇಯ ಇಂಗ್ಲೆಂಡ್ ವಿರುದ್ಧದ 2 ಪಂದ್ಯಗಳ ಟೆಸ್ಟ್‌ ಸರಣಿಯನ್ನು 1-0 ಅಂತರದಲ್ಲಿ ಗೆದ್ದು ಆತ್ಮವಿಶ್ವಾಸ ಅಲೆಯಲ್ಲಿ ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯವನ್ನಾಡಲು ನ್ಯೂಜಿಲೆಂಡ್ ತಂಡ ಮುಂದಾಗಿದೆ.

ಆದರೆ, ಟೀಮ್ ಇಂಡಿಯಾ ಫೈನಲ್ ಪಂದ್ಯದಲ್ಲಿ ಎಂಥದ್ದೇ ಸವಾಲನ್ನು ಎದುರಿಸಲು ಸಜ್ಜಾಗಿದ್ದು, ಆತಂಕವಿಲ್ಲದೆ ಪ್ರಶಸ್ತಿಗಾಗಿ ಕಾದಾಟ ನಡೆಸಲಿದೆ ಎಂದು ಭಾರತ ತಂಡದ ಮೂರನೇ ಕ್ರಮಾಂಕದ ಪ್ರಮುಖ ಬ್ಯಾಟ್ಸ್‌ಮನ್‌ ಚೇತೇಶ್ವರ್ ಪೂಜಾರ ಆತ್ಮವಿಶ್ವಾಸದ ಮಾತುಗಳನ್ನು ಆಡಿದ್ದಾರೆ.

ಭಾರತ ಮತ್ತು ನ್ಯೂಜಿಲೆಂಡ್‌ ತಂಡಗಳ ನಡುವೆ ಶುಕ್ರವಾರ (ಜೂನ್ 18) ಸೌತ್‌ಹ್ಯಾಂಪ್ಟನ್‌ನ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ಟೆಸ್ಟ್‌ ಕ್ರಿಕೆಟ್‌ನ ವಿಶ್ವಕಪ್ ಟೂರ್ನಿಯೆಂದೇ ಮಹತ್ವ ಪಡೆದುಕೊಂಡಿರುವ ಚೊಚ್ಚಲ ಆವೃತ್ತಿಯ ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ನಡೆಯಲಿದೆ. ಟೆಸ್ಟ್‌ ಕ್ರಿಕೆಟ್‌ನ ನಂ.1 ಮತ್ತು ನಂ.2 ತಂಡಗಳ ನಡುವಣ ಈ ಜಟಾಪಟಿ ವೀಕ್ಷಿಸಲು ಕ್ರಿಕೆಟ್‌ ಜಗತ್ತು ಕಾತುರದಿಂದ ಎದುರು ನೋಡುತ್ತಿದೆ.

ಟೀಮ್ ಇಂಡಿಯಾ ಕೋಚ್‌ ಆಗಿ ಚಾಪೆಲ್ ಮಾಡಿದ ಏಕೈಕ ತಪ್ಪನ್ನು ಎತ್ತಿ ಹಿಡಿದ ರೈನಾ!

“ಇಂಗ್ಲೆಂಡ್‌ ಎದುರು ನ್ಯೂಜಿಲೆಂಡ್‌ ಟೆಸ್ಟ್‌ ಸರಣಿ ಗೆದ್ದಿದೆ ಎಂಬುದರ ಬಗ್ಗೆ ನಾವು ಕಿಂಚಿತ್ತೂ ತಲೆ ಕೆಡಿಸಿಕೊಂಡಿಲ್ಲ. ಏಕೆಂದರೆ ಈ ಪಂದ್ಯಕ್ಕೆ ಪೂರ್ವ ಸಿದ್ಧತೆ ಸಲುವಾಗಿ ನಮಗೆ ಸಿಕ್ಕ 10-12 ದಿನಗಳ ಕಡೆಗೆ ಮಾತ್ರ ನಾವು ಗಮನ ನೀಡಿ, ಸಂಪೂರ್ಣ ಸಮರಾಭ್ಯಾಸ ಕೈಗೊಂಡಿದ್ದೇವೆ. ಈ ದಿನಗಳ ಸಂಪೂರ್ಣ ಲಾಭವನ್ನು ನಾವು ಪಡೆದಿದ್ದೇ ಆದರೆ, ಖಂಡಿತವಾಗಿ ಫೈನಲ್‌ನಲ್ಲಿ ಮೇಲುಗೈ ಪಡೆಯಲಿದ್ದೇವೆ,” ಎಂದು ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ತನ್ನ ಅಧಿಕೃ ವೆಬ್‌ಸೈಟ್‌ನಲ್ಲಿ ಹಂಚಿಕೊಂಡಿರುವ ವಿಡಿಯೋ ಒಂದರಲ್ಲಿ ಪೂಜಾರ ಹೇಳಿಕೊಂಡಿದ್ದಾರೆ.

ಭಾರತ ತಂಡ ಈ ನಡುವೆ ಸೌತ್‌ಹ್ಯಾಂಪ್ಟನ್‌ನ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ 3 ದಿನಗಳ ಅಭ್ಯಾಸ ಪಂದ್ಯವನ್ನು ಆಡಿದೆ. 20 ಸದಸ್ಯರ ಭಾರತ ತಂಡವನ್ನು ಎರಡು ತಂಡಗಳಾಗಿ ವಿಂಗಡಿಸಿ ಈ ಅಭ್ಯಾಸ ಪಂದ್ಯ ನಡೆಸಲಾಗಿತ್ತು. ಒಂದು ತಂಡಕ್ಕೆ ವಿರಾಟ್ ಕೊಹ್ಲಿ ಮತ್ತೊಂದು ತಂಡಕ್ಕೆ ಕೆಎಲ್ ರಾಹುಲ್ ನಾಯಕರಾಗಿದ್ದರು.

“ಇನ್ನು ಫೈನಲ್ ಪಂದ್ಯದ ಬಗ್ಗೆ ನಾವು ಮಾತನಾಡುವುದಾದರೆ ನಮ್ಮ ಶ್ರೇಷ್ಠ ಆಟವನ್ನು ಆಡಲಿದ್ದೇವೆ. ಟೀಮ್ ಇಂಡಿಯಾ ಅತ್ಯುತ್ತಮ ಆಟವಾಡಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಪಟ್ಟ ಗೆಲ್ಲುವ ಸಾಮರ್ಥ್ಯ ಹೊಂದಿದೆ ಎಂಬುದನ್ನು ಚೆನ್ನಾಗಿ ಅರಿತಿದ್ದೇವೆ,” ಎಂದು ಪೂಜಾರ ವಿಶ್ವಾಸ ಹೊರಹಾಕಿದ್ದಾರೆ.

‘ನಿಜಕ್ಕೂ ಸುಲಭವಲ್ಲ’ ಭಾರತದಲ್ಲಿ ತಾವಾಡಿದ ಅತ್ಯಂತ ಕಠಿಣ ಪಿಚ್‌ ಹೆಸರಿಸಿದ ಗವಾಸ್ಕರ್‌!

ಕೌಂಟಿ ಕ್ರಿಕೆಟ್‌ನಲ್ಲಿ ಆಡಿದ ಅನುಭವ ಹೊಂದಿರುವ ಪೂಜಾರ, ಇಂಗ್ಲೆಂಡ್‌ನಲ್ಲಿ ಪದೇ ಪದೇ ಬದಲಾಗುವ ಹವಾಗುಣಕ್ಕೆ ಹೊಂದಿಕೊಂಡು ಬ್ಯಾಟಿಂಗ್‌ ಮಾಡಿದರಷ್ಟೇ ಯಶಸ್ಸು ಕಾಣಲು ಸಾಧ್ಯ ಎಂದಿದ್ದಾರೆ.

“ಒಂದೇ ದಿನದಲ್ಲಿ ವಿವಿಧ ಹವಾಗುಣದಲ್ಲಿ ಬ್ಯಾಟ್‌ ಮಾಡುವಂತಾಗುವುದು ಸವಾಲಿನ ಸಂಗತಿ. ಏಕೆಂದರೆ ಇದ್ದಕ್ಕಿದ್ದಂತೆ ಮಳೆ ಬಂದಾಗ ಉತ್ತಮವಾಗಿ ಬ್ಯಾಟ್‌ ಮಾಡುತ್ತಿರುವ ಬ್ಯಾಟ್ಸ್‌ಮನ್‌ ಪೆವಿಲಿಯನ್‌ಗೆ ತೆರಳಬೇಕಾಗುತ್ತದೆ. ನಂತರ ಮಳೆ ಅಚಾನಕ್ಕಾಗಿ ನಿಂತು ಆಟ ಆರಂಭವಾದಾಗ ಬ್ಯಾಟ್‌ ಮಾಡುವುದು ಅಷ್ಟು ಸುಲಭದ ಕೆಲಸವಲ್ಲ. ಹೀಗಾಗಿ ಇನಿಂಗ್ಸ್‌ ಮಧ್ಯದಲ್ಲಿ ಹಲವು ವಿರಾಮ ಸಿಗಲಿದೆ. ಇದನ್ನು ಅರ್ಥಮಾಡಿಕೊಂಡು ಬ್ಯಾಟ್‌ ಮಾಡಬೇಕಾಗುತ್ತದೆ. ಮಾನಸಿಕವಾಗಿ ನೀವು ಬಲಿಷ್ಠರಾಗಿರಬೇಕು,” ಎಂದು ಹೇಳಿದ್ದಾರೆ.

ಇಂಗ್ಲೆಂಡ್‌ನ ಮೋಡ ಮುಚ್ಚಿದ ಹವಾಗುಣ ಮತ್ತು ವೇಗಿಗಳಿಗೆ ನೆರವಾಗುವ ಪಿಚ್‌ ನ್ಯೂಜಿಲೆಂಡ್‌ ತಂಡಕ್ಕೆ ಮನೆಯಂಗಣದ ವಾತಾವರಣ ತಂದುಕೊಡಲಿದೆ. ಹೀಗಾಗಿ ಫೈನಲ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಎದುರು ಕಿವೀಸ್‌ಗೆ ಮೇಲುಗೈ ಇದೆ ಎನ್ನಲಾಗುತ್ತಿದೆ. ಆದರೆ, ಕಿವೀಸ್‌ಗೆ ಹೋಲಿಸಿದರೆ ಭಾರತ ತಂಡದ ಬ್ಯಾಟಿಂಗ್‌ ವಿಭಾಗ ಬಲಿಷ್ಠವಾಗಿದ್ದು, ಎದುರಾಳಿ ವೇಗಿಗಳ ದಾಳಿಗೆ ಕೊಹ್ಲಿ ಬಳಗದ ಪ್ರತಿದಾಳಿ ಹೇಗಿರುತ್ತದೆ ಎಂಬುದು ಸಾಕಷ್ಟು ಕುತೂಹಲ ಕೆರಳಿಸಿದೆ.

ಭಾರತ ತಂಡ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ಬಳಿಕ ಜುಲೈನಲ್ಲಿ ಸಂಪೂರ್ಣವಾಗಿ ಇಂಗ್ಲೆಂಡ್‌ನಲ್ಲೇ ಉಳಿದುಕೊಳ್ಳಲಿದೆ. ಬಳಿಕ ಆಗಸ್ಟ್‌ 4ರಂದು ಆರಂಭವಾಗಲಿರುವ ಐದು ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್‌ ಸರಣಿಯಲ್ಲಿ 5 ಪಂದ್ಯಗಳ ಸರಣಿಯನ್ನಾಡಲಿದೆ.



Source link

Leave a Reply

Your email address will not be published.