ಹೈಲೈಟ್ಸ್‌:

  • ಕ್ರಿಕೆಟ್‌ ಅಂಗಣದಲ್ಲಿ ಮುಂದುವರಿದ ಬಾಂಗ್ಲಾ ಆಲ್‌ರೌಂಡರ್‌ ಶಕಿಬ್ ಅಲ್ ಹಸನ್ ರಂಪಾಟ.
  • ಬಾಂಗ್ಲಾ ಪ್ರೀಮಿಯರ್‌ ಲೀಗ್‌ನಲ್ಲಿ ಮಿತಿ ಮೀರಿ ವರ್ತಿಸಿ ವಿವಾದಕ್ಕೆ ಸಿಲುಕಿರುವ ಎಡಗೈ ಆಟಗಾರ.
  • ವೃತ್ತಿದುಕಿನುದ್ದಕ್ಕೂ ಸಾದಾ ಒಂದಲ್ಲಾ ಒಂದು ವಿವಾದದ ಮೂಲಕ ಭಾರಿ ಸುದ್ದಿಯಾಗಿರುವ ಶಕಿಬ್.

ಬೆಂಗಳೂರು: ಬಾಂಗ್ಲಾ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಅಂಪೈರ್‌ ತೀರ್ಪಿಗೆ ಅಸಮಾಧಾನ ಹೊರಹಾಕಿ ಸ್ಟಂಪ್ಸ್‌ಗೆ ಜಾಡಿಸಿ ಒದೆಯುವ ಮೂಲಕ ಬಾಂಗ್ಲಾದೇಶ ತಂಡದ ಸ್ಟಾರ್‌ ಆಲ್‌ರೌಂಡರ್‌ ಶಕಿಬ್ ಅಲ್‌ ಹಸನ್‌ ಭಾರಿ ಸುದ್ದಿಯಾಗಿದ್ದಾರೆ.

ಢಾಕಾದ ಶೇರ್‌ ಬಾಂಗ್ಲಾ ಸ್ಟೇಡಿಯಂನಲ್ಲಿ ನಡೆದ ಮೊಹಮ್ಮಡನ್ ಸ್ಪೋರ್ಟಿಂಗ್ ಮತ್ತು ಅಭಾನಿ ಲಿಮಿಟೆಡ್‌ ವಿರುದ್ಧದ ಪಂದ್ಯದಲ್ಲಿ ಈ ಘಟನೆ ನಡೆದಿದೆ. ಮುಷ್ಫಿಕರ್‌ ರಹೀಮ್‌ ಬ್ಯಾಟ್‌ ಮಾಡುವಾಗ ಶಕಿಬ್‌ ಎಲ್‌ಬಿಡಬ್ಲ್ಯು ಸಲುವಾಗಿ ಮನವಿ ಮಾಡಿದ್ದರು. ಆದರೆ, ಸ್ಟ್ರೈಕ್‌ ಅಂಪೈರ್‌ ನಾಟ್‌ಔಟ್‌ ಎಂದು ಹೇಳುತ್ತಿದ್ದಂತೆ ಅಸಮಾಧಾನಗೊಂದು, ಆನ್‌ಫೀಲ್ಡ್‌ ಅಂಪೈರ್‌ನ ನಿಂದಿಸಿದ್ದಲ್ಲದೆ ಕಾಲಿನಿಂದ ಸ್ಟಂಪ್ಸ್‌ಗೆ ಒದ್ದಿದ್ದಾರೆ.

ಶಕಿಬ್ ತಮ್ಮ ಈ ದುರ್ನಡತೆಗೆ ಭಾರಿ ಬೆಲೆ ತೆತ್ತುವ ಸಾಧ್ಯತೆ ಇದೆ. ಬಾಂಗ್ಲಾ ಕ್ರಿಕೆಟ್‌ ಮಂಡಳಿ ಮತ್ತು ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್‌ ಈ ವಿಚಾರವಾಗಿ ಗಂಭೀರ ಕ್ರಮ ತೆಗೆದುಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ. ಅಂದಹಾಗೆ ಶಕಿಬ್‌ ಅವರ ಈ ರೀತಿಯ ಅತಿಯಾದ ವರ್ತನೆ ಇದು ಮೊದಲೇನಲ್ಲ. ಈ ಹಿಂದೆಯೂ ಹಲವು ಬಾರಿ ವಿವಾದ ಮೈಲೇಲೆ ಎಳೆದುಕೊಂಡಿದ್ದಾರೆ. ಅಂತಹ ಕೆಲ ವಿವಾದಗಳನ್ನು ಇಲ್ಲಿ ವಿವರಿಸಲಾಗಿದೆ.

ಸ್ಟಂಪ್‌ಗಳನ್ನು ಕಾಲಿನಿಂದ ಒದ್ದು ದರ್ಪ ಮೆರೆದ ಶಕಿಬ್‌! ವಿಡಿಯೋ ವೈರಲ್‌

ಐಸಿಸಿಯಿಂದ ನಿಷೇಧ ಶಿಕ್ಷೆ
2018ರ ಇಂಡಿಯನ್ ಪ್ರೀಮಿಯರ್‌ ಲೀಗ್ ಟೂರ್ನಿ ವೇಳೆ ತಮ್ಮನ್ನು ಮ್ಯಾಚ್‌ ಫಿಕ್ಸಿಂಗ್‌ ಸಲುವಾಗಿ ಬುಕಿಗಳು ಸಂಪರ್ಕಿಸಿದ್ದ ವಿಚಾರವನ್ನು ಮುಚ್ಚಿಟ್ಟಿದ್ದ ಶಕಿಬ್‌ ಭಾರಿ ಬೆಲೆಯನ್ನೇ ತೆತ್ತಿದ್ದರು. ಈ ಬಗ್ಗೆ ತನಿಖೆ ಮಾಡಿದ್ದ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್ (ಐಸಿಸಿ), ಮ್ಯಾಚ್‌ ಫಿಕ್ಸಿಂಗ್‌ನಲ್ಲಿ ತೊಡಗದಿದ್ದರೂ, ಬುಕಿಗಳ ಸಂಪರ್ಕವನ್ನು ಗುಪ್ತವಾಗಿ ಇಟ್ಟಿದ್ದ ಸಲುವಾಗಿ 2 ವರ್ಷಗಳ ಕಠಿಣ ನಿಷೇಧ ಶಿಕ್ಷೆ ವಿಧಿಸಿತ್ತು. 2019ರ ಒಡಿಐ ವಿಶ್ವಕಪ್ ಟೂರ್ನಿಯಲ್ಲಿ 600ಕ್ಕೂ ಹೆಚ್ಚು ರನ್‌ ಗಳಿಸಿ 11 ವಿಕೆಟ್‌ ಕೂಡ ಪಡೆದಿದ್ದ ಶಕಿಬ್‌ಗೆ ಅದೇ ವರ್ಷ ಐಸಿಸಿ ನಿಷೇಧದ ಬರೆ ಎಳೆದಿತ್ತು.

ಅಶಿಸ್ತಿನ ವರ್ತನೆ ತೋರಿದ್ದ ಶಕಿಬ್
2014ರ ಏಷ್ಯಾಕಪ್‌ ಏಕದಿನ ಕ್ರಿಕೆಟ್‌ ಟೂರ್ನಿಯ ಪಂದ್ಯವೊಂದರಲ್ಲಿ ಶಕಿಬ್ ಡ್ರೆಸಿಂಗ್‌ ರೂಮ್‌ನಲ್ಲಿ ಕುಳಿತು ತಮ್ಮ ತೊಡೆ ಸಂದಿಗೆ ಕೈ ಹಾಕಿ ಪರ ಪರ ಕೆರೆದುಕೊಳ್ಳುತ್ತಿರುವ ವಿಡಿಯೋವನ್ನು ಲೈವ್‌ ಟೆಲಿಕಾಸ್ಟ್‌ ಮಾಡಲಾಗಿತ್ತು. ಈ ಅಶಿಸ್ತಿನ ವರ್ತನೆ ಹಿನ್ನೆಲೆಯಲ್ಲಿ ಶಕಿಬ್‌ಗೆ 3800 ಡಾಲರ್‌ ದಂಡ ವಿಧಿಸಲಾಗಿತ್ತು. ಆ ಪಂದ್ಯದಲ್ಲಿ ಬಾಂಗ್ಲಾ ತಂಡ 61 ರನ್‌ಗಳ ಸೋಲುಂಡಿತ್ತು.

ತಾಳ್ಮೆ ಕಳೆದುಕೊಂಡ ಆಲ್‌ರೌಂಡರ್‌
ಆನ್‌ಫೀಲ್ಡ್‌ ಅಂಪೈರ್‌ ನಿರ್ಧಾರಕ್ಕೆ ಬೇಸರಗೊಂಡು ಸ್ಟಂಪ್ಸ್‌ಗೆ ಜಾಡಿಸಿ ಒದ್ದಿದ್ದ ಶಕಿಬ್ ಅಲ್‌ ಹಸನ್‌, ಇದೇ ಪಂದ್ಯದಲ್ಲಿ ಎರಡನೇ ಬಾರಿ ತಾಳ್ಮೆ ಕಳೆದುಕೊಂಡರು. ಅಂಪೈರ್‌ಗೆ ಬಾಯಿಗೆ ಬಂದ ರೀತಿಯಲ್ಲಿ ಅವಾಚ್ಯ ಶಬ್ದಗಳಿಂದ ನಿಂದಿಸಿರುವ ಶಕಿಬ್, ಕೆಲ ಸಮಯದ ನಂತರ ಎಲ್ಲಾ ಸ್ಟಂಪ್ಸ್‌ಗಳನ್ನು ಕಿತ್ತು ನೆಲಕ್ಕೊಗೆಯುವ ಮೂಲಕ ಅಸಮಾಧಾನ ಹೊರಹಾಕಿದ್ದಾರೆ. ಈ ವಿಡಿಯೋ ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್‌ ಆಗಿದ್ದು, ಶಕಿಬ್ ವರ್ತನೆಯನ್ನು ಟೀಕಿಸಲಾಗಿದೆ.

ಪಾಕ್ ತಂಡದ ಆಟ ಸುಧಾರಣಗೆ ಕೊಹ್ಲಿಯಿಂದ ಸಲಹೆ ಪಡೆದ ಇಮಾಮ್ ಉಲ್ ಹಕ್!

ನಿಧಾಸ್‌ ಟ್ರೋಫಿಯಲ್ಲಿ ನೋ-ಬಾಲ್ ವಿವಾದ
ನಿಧಾಸ್‌ ಟ್ರೋಫಿ ಟಿ20 ಕ್ರಿಕೆಟ್‌ ಸರಣಿಯಲ್ಲಿ ನಡೆದ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ಶಕಿಬ್ ಅಲ್ ಹಸನ್‌ ಅತಿಯಾಗಿ ವರ್ತನೆ ಮಾಡಿದ್ದರು. ಆನ್‌ಫೈಲ್ಡ್‌ ಅಂಪೈರ್‌ ವೇಗಿ ಇಸುರು ಉದಾನ ಬ್ಯಾಕ್‌ ಟು ಬ್ಯಾಕ್ ಬೌನ್ಸರ್‌ ಎಸೆದರೂ ನೋ ಬಾಲ್ ನೀಡದೇ ಇರುವುದಕ್ಕೆ ಅಂದು ಬಾಂಗ್ಲಾ ತಂಡದ ನಾಯಕ ಕೂಡ ಆಗಿದ್ದ ಶಕಿಬ್ ಅತಿಯಾದ ವರ್ತನೆ ತೋರಿದ್ದರು. ಲೆಗ್‌ ಅಂಪೈರ್‌ ನೋ ಬಾಲ್‌ ಎಂದರೂ ಸ್ಟ್ರೈಕ್ ಅಂಪೈರ್‌ ಅದನ್ನು ಕಡೆಗಣಿಸಿದ್ದು ಶಕಿಬ್ ಅಸಮಾಧಾನಕ್ಕೆ ಕಾರಣವಾಗಿತ್ತು. ಈ ಸಲುವಾಗಿ ಪಂದ್ಯದ ಸಂಭಾವನೆಯಲ್ಲಿನ ಶೇ. 25ರಷ್ಟು ಮೊತ್ತವನ್ನು ಶಕಿಬ್ ದಂಡ ತೆತ್ತಿದ್ದರು.

ಬಿಬಿಎಲ್‌ನಲ್ಲೇ ಮತ್ತೊಂದು ವಿವಾದ
ಬಾಂಗ್ಲಾ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಈ ಹಿಂದೆಯೂ ಶಕಿಬ್ ವಿವಾದದ ಕೇಂದ್ರಬಿಂದುವಾಗಿದ್ದರು. 2015ರ ಬಿಬಿಎಲ್ ಟೂರ್ನಿಯಲ್ಲಿ ಅಂಪೈರ್‌ ತನ್ವೀರ್‌ ಅಹ್ಮದ್‌ ಅವರೊಟ್ಟಿಗೆ ಬೈದಾಟಕ್ಕೆ ಇಳಿದು ಸುದ್ದಿಯಾಗಿದ್ದರು. ರಂಗ್ಪುರ್‌ ರೈಡರ್ಸ್‌ ಮತ್ತು ಸೈಲ್ಹೆಟ್‌ ಸೂಪರ್ಸ್ಟಾರ್ಸ್‌ ನಡುವೆ ಮೀರ್‌ಪುರದಲ್ಲಿ ನಡೆದ ಪಂದ್ಯದಲ್ಲಿ 110 ರನ್‌ಗಳ ಗುರಿ ಬೆನ್ನತ್ತಿದ್ದ ಸೈಲ್ಹೆಟ್‌ ತಂಡ 13 ಓವರ್‌ಗಳಲ್ಲಿ 5 ವಿಕೆಟ್‌ಗೆ 64 ರನ್ ಮಾತ್ರ ಗಳಿಸಿತ್ತು. ನಂತರದ ಓವರ್‌ನಲ್ಲಿ ರಹೀಮ್‌ ಬ್ಯಾಟ್‌ಗೆ ಚೆಂಡು ತಾಗಿತ್ತು. ಕ್ಯಾಚ್‌ ಸಲುವಾಗಿ ಶಕಿಬ್ ಮನವಿ ಮಾಡಿದ್ದರು. ಅಂಪೈರ್ ನಿರಾಕರಿಸಿದ್ದಕ್ಕೆ ಅಂಗಣದಲ್ಲೇ ಶಕಿಬ್ ಬೈಯಲು ಶುರು ಮಾಡಿದ್ದರು. ಈ ಸಲುವಾಗಿ ಒಂದು ಪಂದ್ಯ ನಿಷೇಧ ಶಿಕ್ಷೆಗೆ ಕೂಡ ಗುರಿಯಾಗಿದ್ದರು. ಆ ಪಂದ್ಯದಲ್ಲಿ ರೈಡರ್ಸ್‌ ಗೆಲುವು ಸಿಕ್ಕಿತ್ತು.



Source link

Leave a Reply

Your email address will not be published.