ಹೈಲೈಟ್ಸ್‌:

  • ಇತ್ತೀಚೆಗೆಷ್ಟೇ ಅಶ್ವಿನ್‌ನ ವಿಶ್ವ ಶ್ರೇಷ್ಠ ಎಂದು ಕರೆಯಲಾಗದು ಎಂದು ಹೇಳಿದ್ದ ಸಂಜಯ್ ಮಾಂಜ್ರೇಕರ್‌.
  • ಇದರ ಬೆನ್ನಲ್ಲೇ ಪಾಕ್‌ನ ಮಾಜಿ ಸ್ಪಿನ್ನರ್‌ ಸಯೀದ್‌ ಅಜ್ಮಲ್ ವಿವಾದಾತ್ಮಕ ಹೇಳಿಕೆಯೊಂದನ್ನು ನೀಡಿದ್ದಾರೆ.
  • ಅಶ್ವಿನ್ ಬ್ಯಾನ್‌ ಆಗಬೇಕಿತ್ತು, ಬಿಸಿಸಿಐ ಅವರನ್ನು ರಕ್ಷಿಸಿದೆ ಎಂದು ಆರೋಪ ಮಾಡಿದ ಮಾಜಿ ಆಫ್‌ ಸ್ಪಿನ್ನರ್‌.

ಹೊಸದಿಲ್ಲಿ: ಇಂದು ವಿಶ್ವ ಕ್ರಿಕೆಟ್‌ನ ಮುಂಚೂಣಿ ಆಫ್‌ ಸ್ಪಿನ್ನರ್‌ ಆಗಿರುವ ಟೀಮ್ ಇಂಡಿಯಾ ತಾರೆ ಆರ್‌ ಅಶ್ವಿನ್ ಅವರನ್ನು ಸಾರ್ವಕಾಲಿಕ ಶ್ರೇಷ್ಠ ಸ್ಪಿನ್ನರ್‌ ಎಂದು ಕರೆಯಲು ಸಾಧ್ಯವಿಲ್ಲ ಎಂದು ಭಾರತ ತಂಡದ ಮಾಜಿ ಆಟಗಾರ ಸಂಜಯ್ ಮಾಂಜ್ರೇಕರ್‌ ವಿವಾದ ಸೃಷ್ಟಿಸಿದ್ದರು.

ಇದೀಗ ಪಾಕಿಸ್ತಾನದ ಮಾಜಿ ಆಫ್‌ ಸ್ಪಿನ್ನರ್‌ ಅಯೀದ್‌ ಅಜ್ಮಲ್ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಮತ್ತೊಂದು ವಿವಾದಾತ್ಮಕ ಹೇಳಿಕೆ ಕೊಟ್ಟಿದ್ದಾರೆ. ಅಶ್ವಿನ್‌ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ ನಿಷೇಧ ಹೇರದೇ ಇರಲಿ ಎಂದು ಬಿಸಿಸಿಐ ಉದ್ದೇಶ ಪೂರ್ವಕವಾಗಿ ಅವರನ್ನು ಆಟದಿಂದ ಹೊರಗಿಟ್ಟಿತ್ತು ಎಂದು ಅಜ್ಮಲ್ ಗಂಭೀರ ಆರೋಪ ಮಾಡಿದ್ದಾರೆ.

ಪಾಕಿಸ್ತಾನದ ಮಾಜಿ ಆಫ್‌ ಸ್ಪಿನ್ನರ್‌ ಸಯೀದ್‌ ಅಜ್ಮಲ್‌, ತಮ್ಮ ಕ್ರಿಕೆಟ್‌ ವೃತ್ತಿಬದುಕಿನಲ್ಲಿ ಹಲವು ಬಾರಿ ಶಂಕಾಸ್ಪದ ಬೌಲಿಂಗ್ ಶೈಲಿಯಿಂದಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ (ಐಸಿಸಿ)ನಿಂದ ನಿಷೇಧಕ್ಕೆ ಗುರಿಯಾಗಿದ್ದಾರೆ.

ಟೀಮ್ ಇಂಡಿಯಾ ಕೋಚ್‌ ಆಗಿ ಚಾಪೆಲ್ ಮಾಡಿದ ಏಕೈಕ ತಪ್ಪನ್ನು ಎತ್ತಿ ಹಿಡಿದ ರೈನಾ!

“ಯಾರನ್ನೂ ಕೇಳದೆ ಎಲ್ಲಾ ನೀತಿ ನಿಯಮಗಳನ್ನು ಬದಲಾಯಿಸಲಾಗಿತ್ತು. ನಾನು 8 ವರ್ಷಗಳಿಂದ ಕ್ರಿಕೆಟ್‌ ಆಡುತ್ತಿದ್ದೆ. ಆಗ ತರಲಾದ ನಿಯಮಗಳೆಲ್ಲವೂ ಕೇವಲ ನನಗಷ್ಟೇ ಅನ್ವಯವಾಗುತ್ತಿದ್ದವು. ಏಕೆಂದರೆ ಆ ಸಮಯದಲ್ಲಿ ಅಶ್ವಿನ್ ಅವರನ್ನು 6 ತಿಂಗಳ ಕಾಲ ಕ್ರಿಕೆಟ್‌ನಿಂದ ದೂರ ಇಡಲಾಗಿತ್ತು. ಇದಕ್ಕೆ ಕಾರಣವೇನು? ಸರಳ, ನಿಮ್ಮ ಬೌಲರ್‌ ಬ್ಯಾನ್‌ ಆಗದಂತೆ ರಕ್ಷಿಸಲು ಆಟದಿಂದ ದೂರ ಇಟ್ಟು ಅವರ ಶೈಲಿಯನ್ನು ತಿದ್ದುವ ಕೆಲಸ ಮಾಡಿದ್ದಿರಿ. ಪಾಕಿಸ್ತಾನದ ಬೌಲರ್‌ ಬ್ಯಾನ್‌ ಆದರೆ ಯಾರೊಬ್ಬರೂ ತಲೆ ಕೆಡಿಸಿಕೊಳ್ಳುವುದಿಲ್ಲ. ಎಲ್ಲರಿಗೂ ಹಣವೇ ಮುಖ್ಯ,” ಎಂದು ಕ್ರಿಕ್‌ವಿಕ್ ಕಾರ್ಯಕ್ರಮದಲ್ಲಿ ಅಜ್ಮಲ್ ಗಂಭೀರ ಆರೋಪ ಮಾಡಿದ್ದಾರೆ.

ಇದೇ ವೇಳೆ 2011 ಐಸಿಸಿ ಏಕದಿನ ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ನಡೆದ ಭಾರತ ಮತ್ತು ಪಾಕಿಸ್ತಾನ ನಡುವಣ ಸೆಮಿಫೈನಲ್‌ ಪಂದ್ಯದ ಬಗ್ಗೆ ಮಾತನಾಡಿದ ಅಜ್ಮಲ್, ಆ ಪಂದ್ಯದಲ್ಲಿ ಸಚಿನ್ ತೆಂಡೂಲ್ಕರ್‌ ಎಲ್‌ಬಿಡಬ್ಲ್ಯು ಔಟ್‌ ಆಗಿದ್ದರೂ ಕೂಡ ಡಿಆರ್‌ಎಸ್‌ ವೈಫಲ್ಯದಿಂದ ಜೀವದಾನ ಪಡೆದಿದ್ದರು ಎಂದಿದ್ದಾರೆ. ಭಾರತ ತಂಡ ಆ ಪಂದ್ಯದಲ್ಲಿ ಭರ್ಜರಿ ಜಯ ದಾಖಲಿಸಿತ್ತು.

‘ನಿಜಕ್ಕೂ ಸುಲಭವಲ್ಲ’ ಭಾರತದಲ್ಲಿ ತಾವಾಡಿದ ಅತ್ಯಂತ ಕಠಿಣ ಪಿಚ್‌ ಹೆಸರಿಸಿದ ಗವಾಸ್ಕರ್‌!

“ಆನ್‌ಫೀಲ್ಡ್‌ನಲ್ಲಿ ಸಚಿನ್‌ ಔಟ್‌ ಎಂದು ತೀರ್ಪು ನೀಡಿದ್ದ ಅಂಪೈರ್‌, ಅದು ಸರಿಯಾದ ನಿರ್ಧಾರ ಎಂದು ಹೇಳಿಕೆ ಕೊಡಲು ಸಿದ್ದರಿದ್ದರು. ಏಕೆಂದರೆ ಆ ತೀರ್ಪು ಅಷ್ಟು ಸ್ಪಷ್ಟವಾಗಿತ್ತು. ಆದರೆ, ಡಿಆರ್‌ಎಸ್‌ನಲ್ಲಿ ಏನನ್ನು ಬೇಕಾದರೂ ಬದಲಾಯಿಸಬಹುದು. ಲೈವ್‌ನಲ್ಲಿ ಈಗಲೂ ಕೂಡ ಕೇವಲ ನನಗಷ್ಟೇ ಅಲ್ಲ ಯಾವುದೇ ಅಂಪೈರ್‌ಗೆ ಅದು ಔಟ್‌ ಎಂದು ಗೊತ್ತಾಗುತ್ತದೆ. ಆದರೆ, ಡಿಆರ್‌ಎಸ್‌ ಮಾತ್ರ ನಾಟ್‌ಔಟ್‌ ಎಂದಿತ್ತು. ಈ ಬಗ್ಗೆ ಸಾವಿರಾರು ಮಂದಿ ನನ್ನನ್ನು ಪ್ರಶ್ನೆ ಮಾಡಿದ್ದಾರೆ. ಆದರೆ ಅವರಿಗೆ ಹೇಗೆ ಉತ್ತರಿಸುವುದು ನನಗೆ ತಿಳಿದಿಲ್ಲ,” ಎಂದಿದ್ದಾರೆ.

ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡ ಸಚಿನ್ ತೆಂಡೂಲ್ಕರ್‌ (85) ಅವರ ಅಮೋಘ ಅರ್ಧಶತಕದ ಬಲದಿಂದ 50 ಓವರ್‌ಗಳಲ್ಲಿ 9 ವಿಕೆಟ್‌ಗೆ 260 ರನ್‌ಗಳ ಸವಾಲಿನ ಮೊತ್ತ ದಾಖಲಿಸಿತ್ತು. ಬಳಿಕ ಬ್ಯಾಟ್‌ ಮಾಡಿದ ಪಾಕಿಸ್ತಾನ, ಭಾರತ ತಂಡದ ಶಿಸ್ತಿನ ದಾಳಿಗೆ ನಲುಗಿ 231 ರನ್‌ಗಳಿಗೆ ಆಲ್‌ಔಟ್‌ ಆಯಿತು. 29 ರನ್‌ಗಳಿಂದ ಗೆದ್ದು ಫೈನಲ್‌ ತಲುಪಿದ ಭಾರತ ತಂಡ ಶ್ರೀಲಂಕಾ ತಂಡವನ್ನು ಮಣಿಸಿ ಚಾಂಪಿಯನ್ಸ್‌ ಪಟ್ಟ ಅಲಂಕರಿಸಿತ್ತು.



Source link

Leave a Reply

Your email address will not be published.